Bawasan Ang Pasanin

Ibinulong sa dapithapon at umaga

Nawa'y makaalpas sa lahat ng problema

Hangga't mababaw, hangga't mababa,

Hangga't 'di pa nakakalunod o nakakalula

Idinalangin sa mga nagdaang bulalakaw

Sisiglang muli ang mga gabing mapanglaw

At 'di na mapuyat tuwing madaling-araw

Ng mga pangarap na nagkaligaw-ligaw

Ipinaubaya na sa hiwaga ng kalawakan

Ang mga taong umalis at di nagpaalam

Sa mga lumimot at hindi na nagparamdam

Hindi na maghahabol, hindi na makikialam

Isinusuko na sa mga paru paro't alitaptap

Ang mga hinanakit sa nabigong pangarap

Pipiliting bumangon at muling hahanap

Ng dahilang magpatuloy gitna ng hirap

Hindi na ipipilit.

Hindi magmamadali.

Dahil ang tunay na para sa akin,

Payapa dapat sa damdamin.