Mabuting Pagkamuhi

Akala ko dati, mali ang anumang pagkamuhi,

Na ang galit ay lason na sisira sa paguu-ugali,

At palaging tama ang magtiis at magtimpi,

Itikom ang bibig para sa Kanyang luwalhati.

Hanggang magising ako sa gobyernong malupit,

Na nagkukunyaring mabait at may malasakit.

Mga pangakong napako at yamang kinupit,

Ang tumuligsa sa kanila'y buhay ang kapalit.

Hindi pala mali ang mamuhi sa kasamaan,

Ang magalit sa tiwala at isuklam ang kawatan.

Lalo't nakasalang ang buhay at kinabukasan,

Ng bayang ginahasa't nilukmok sa karimlan.